im 7tä himu

weni aube öppis, wo het söue erlediget sii, nid ha wöue füürersch mache u dhäng usde seck nää, so het mi mueter mi ermunteret. het gseit, chomm machs schnäu, de hesch hingerder. u mängisch o: de chunnsch de i sibet himu. i chami nümm erinnere, obi aus ching scho nachegfragt haa, wo denn der 7et himu isch oder was das eigentlich isch. vilech hanis aus ganz säubverschtändlich gnoo, dass es sibe himmle git. aber auer wahrschiinlichkeit hani scho nachegfragt, ig bi es üsserscht gwungerigs ching gsii. no hütt interessiere mi schtrasseching u di chliine detail mee aus Zbox u konsorte.
7ä himmlä. warum eigentlech 7ä? warum mer 7ä wuchetag hei, weisi scho. da hanimer scho mängisch gedanke gmacht. ou warum für üs weschtler 13 ä unglückszau isch. aber dadezue chumeni es angersch mau. isch ächt öpper scho mau go luege i die himmle u hett se zeut? glücklech wie im 7te himu, seit me oder im 7te himu schweuge, öppe wemer verliebt isch. nähm mi scho gruusli wunger, wo denn der ungerschiid zwüsche au dene 7ä himmle isch.
vorere wuche hani ds läbesrad vo de tibeter schtudiert. auso ersch chli driglueget. wett nid öppe säge, dasi das scho vouschtändig kapiert haa. im 2te chreis si di sächs inkarnationsplätz dargschteut. dä vo de mönsche, dä kenneni guet, läbe schliesslich im momänt wi di meischte meischtens i dämm. dä vo de tier, dä vo de hungrige geischter u dä vor höu. de gits dä vode götter. si hei e erkenntnisboum drinn u chöi auizyt dfrücht ässe. da isches im 2te himu bide gigante scho schwiriger. die si niidisch ufd götter, wöu si am boum müesse wasser gä u nid eifach chöi profitiere vom wüsse. schono interessant, dass di zwöi himmle so ungerschidlech sii. u dases dert o niid u missgunscht git.
u itz hani geschter erfahre, dass d'stupa, hie in boudha, wo di gröschti isch vo nepal, obe 13 schtufe het. auso obde ouge: für di 13 himmle wo d'tibeter kenne. scho komisch. mir weschtler leere auso scho aus ching nume grad guet dheifti vo de himmle kenne. vo de angere 6 himmle ret bi üs niemer. die wärde verschwige. bi üs gits nume sibe. vilech het das dademit ztüe, das mir em egoismus oder em ig bi säuber gross, so grossi bedütig biimässe. u di letschte 6 himmle chame ersch entdecke wemer der egoismus oder d'egozentriertheit ufgää het? ig schteue mer vor, das es haut ide himmle ähnlech wie hie uf ärde isch. schliesslich rede d'tibeter ja o vo de götter, dass si zwar e wunderschöne ort hei mit em wüssensboum, äber äbe o nid glücklech sii, wöu si wüsse, dass si irgendeinisch dä platz wider müesse verlaa um amene angere ort z'inkarniere. für'd buddhischte isch das aus ersch z'änd, wenn si nümm müesse inkarniere. wioimmerdämmosig, heimer vilech die letschte 6 himmle nid im weschte, wöu mer nid glasseheit hei, di angere so chönne hiiznä wie si sii. immer wettermers doch so, wiemers fürs beschte haute. u so schtö üs vilech nume 7 himmle offe nachem tod. wärweis. nimmtmidenowunger was das mit de 13 himmle ufsech het. zverfouge isches uf jedefau wärt. o weni scho mitem sokrates übereinschtimme. je meh me weis, deschto meh ischme sich bewusst, dasme no viu meh chönnt wüsse. oder wie är's gseit het: i weis dasi nüt weis.